Ano 'yun?

Sacred Vestments

2008-08-14T16:46:00.005+08:00

Ang pagdiriwang ng Banal na Misa ay isang napaka-sagradong okasyon para sa ating mga mananampalatayang Katoliko. Kung kaya sa ating pagdalo sa Banal na Misa nagsusuot tayo ng mga kasuotang angkop sa nasabing pagdiriwang. Ganoon din ang mga pari na sumasagisag kay Kristo tuwing isinasagawa ang Banal na Misa. Sila ay may mga espesyal ding kasuotan at ang bawat isa dito ay may malalim na kahulugan. Ang kulay at mga disenyo ay naayon sa okasyong ipinagdiriwang ng Simbahan.

CHI-ROH
Ang kalimitang disenyo na makikita natin ay ang krus bilang tanda ni Jesus. Ang tandang ito ay tinatawag na Chi-Rho. Ang Chi-Rho ay kumakatawan sa dalawang titik sa pangalan ni Kristo ang “Chi” o “Ch” at “Rho”. Ang disenyong ito ay hindi lamang sa mga kasuotan ng pari makikita kung hindi pati na rin sa iba pang mga banal na bagay na sumasagisag kay Jesus.

Mga kulay ng kasuotan para sa iba’t-ibang pagdiriwang

PUTI / GOLD
Sumisimbolo ng kalinisan at kagalakan. Ang puting kasuotan ay ginagamit sa panahon ng Kapaskuhan at Easter. Ginagamit rin ito sa mga espesyal na Linggo, sa kapistahan ng Mahal na Ina, mga angel at mga santo (maliban sa mga martir).

PULA
Sumisimbolo sa apoy at dugo. Isinusuot sa kapistahan ng Banal na Espiritu o Pentecost. Bilang pagpapaalala ng Banal na Espiritu sa anyong apoy. Ginagamit rin ang kulay na ito sa Palm Sunday, Good Friday, at sa mga kapistahan ng mga apostoles at iba pang mga banal na nag-alay ng kanilang buhay para sa Ebanghelyo (kilala sa tawag na ‘martir’), e.g. si San Lorenzo Ruiz.

BERDE
Sumisimbolo sa pag-asa at pag-tubo o pag-laki. Ang kulay na ito ay ginagamit sa mga Linggo pagkatapos ng Epipanya. At sa lahat ng araw pagkatapos ng Pentekostes. Ang Berde ay sumasagisag sa mga berdeng dahon na nagpapa-alala ng pag-asa sa pagmamahal ng Diyos para sa ating lahat.

LILA / PURPLE
Ito ang kulay ng pagdadalamhati. Isinusuot ito sa mga panahon ng Adbiyento at Kuwaresma. Ang kulay na ito ay nagpapaalala sa pagpepenitensiya at paghingi ng tawad sa ating mga kasalanan at paghahanda para sa kasiyahang dulot ng pagsilang ni Kristo at ng Kanyang muling pagkabuhay. Ginagamit rin ang kulay na ito sa kapistahan ng Holy Innocents tuwing December 28 bilang pagpapakita ng simpatiya ng Simbahan para sa mga unang martir.

IBA'T IBANG SAGRADONG KASUOTAN

AMICE
Mula sa salitang Latin “Amicire” na ang kahulugan ay “takipan”. Hugis rektanggulo na may panali sa itaas na bahagi. Isinusot sa ilalim ng Alb. Noong unang panahon ang isang kriminal na nahatulan ng kamatayan ay tinatakpan ang ulo, kung kaya ang kasuotang ito ay nagpapa-alala ng paghamak na ginawa kay Jesus.

ALB
Mula sa salitang Latin na ang kahulugan ay “puti”, ang kasuotang ito ay gawa sa isang puting telang linen na isinusuot ng pari, obispo o diyakono. Isinasagisag nito ay kadalisayan at kalinisan ng kaluluwa at katawan. Ang kasuotan ring ito ang nagpapa-alala ng balabal o roba na ibinihis kay Jesus ni Herodes habang kanya itong kinukutya at inaalipusta.

CINCTURE
Ito ay isang lubid na ibinuhol ang magkabilang dulo na itinatali sa baywang. Ang pagkakabuhol ng lubid na ito sa magkabilang dulo ay sumasagisag ng pagsunod sa Diyos at kalinisang-puri. Isang pagpapaalala rin na si Jesus ay iginapos sa haliging bato.

STOLE
Ito ay isang tela na mahaba at makitid na may sukat na 7 ½ hanggang 9 na talampakan ang haba at may lapad na 3 hanggang 4 na pulgada. May iba’t-ibang disenyo o palamuti ito. Sa mga pari inililigid ito paikot sa leeg at balikat na bumabagtas sa dibdib pababa. At para naman sa mga diyakono, ito ay isinusuot sa kaliwa pahilig sa dibdib tulad ng isang “sash”“. Ang “stole” ay isang espesyal na pagkakakilanlan ng isang pari; isang tanda na siya ay tinawag ng Diyos para pumatnubay sa mga tao. Inilalarawan din nito ang pamatok na pinasan ni Jesus gayon din ang walang hanggang buhay na Kanyang pangako sa ating lahat.

Noong panahon ng mga Romano ang istola ay ibinibigay ng isang emperador sa kanyang mensahero bilang pagpapakita na ang kanyang kapangyarihan ay dinadala nito.

CHASUBLE
Mula sa salitang Latin “Casula” na ang kahulugan ay “Little House” o “munting tirahan o tahanan”, ito ang nagsisilbing tirahan o kanlungan ng pari. Sa matagal na panahon ang kasuotang ang nagsilbing kasuotang panlabas ng mga Pari. Ito ang pinakamadalas na makikita na kasuotan ng mga pari sa kasalukuyan. Isinasagisag nito ang pag-ibig.

MANIPOLE
Ito ay isang maiksing linen na pahaba, ang disenyo o kulay ay naaayon sa disenyo at kulay ng chasuble at isinasampay sa kaliwang braso. Ito ay pagpapa-alala sa isang pari na kanyang titiisin ang sakit o dalamhati ng makamundong buhay bilang paglilingkod sa Diyos at maka-langit na gantimpala. Inilalagay ng obispo ang maniple sa altar matapos ang pag-usal ng panalangin para sa paghingi ng kapatawaran para sa mga kasalanan. At sa mga pari naman, ito ay kanilang inilalagay sa “sacristy”. Sila rin ay nag-aalay ng panalangin habang hinahalikan ang krus na disenyo nito bago simulan ang Banal na Misa.

biretta

BIRETTA
Ito ay ang sombrerong isinusuot sa ulo. Ang kulay ay naayon sa antas ng katungkulan. Scarlet silk para sa mga cardinals, violet silk para sa mga bishops, at black merlino para sa mga pari, deacons, at seminarians.

MITRE
Isinusuot ito sa ulo ng mga obispo at ginagamit sa mga liturhikal na gawain. Ang pag-gamit nito ay inihalintulad sa mga naunang saserdote o mga pari sa Lumang Tipan. Ang mag cardinals ay nagsusuot ng pinalamutiang mitre sa presensiya ng Santo Papa.

PALLIUM
Nagmula sa salitang Romano “Pallium” o “Palla” na ang kahulugan ay lanang balabal. Isinusuot ito ng mga Santo Papa, archdbishops, at patriarchs bilang simbolo ng kanilang kapangyarihan. Isinusuot ito paikot sa leeg. Ang puting lanang ito ay may disenyong krus na makikita sa likod at harap na bahagi nito.

Texts and Photos : Patty dela Rosa - Paat

Pectoral Cross

2008-04-10T18:40:00.001+08:00

- Ang Episcopal o pectoral cross ay may mga palamuti at gawa sa mamahaling bato. Ikinukwintas malapit sa dibdib. Mula sa Salitang Latin “pectoralis” na ang kahulugan ay “ dibdib”. Isinusuot ito ng Santo Papa, cardinals, bishops, abbots, vicars, apostolic administrators at minsan ng isang Canon. Sinasabi na ang pectoral cross ay kinapapalooban ng tunay na krus na ginamit ni Kristo o kapirasong bahagi ng buto ng isang santo.(Patty dela Rosa - Paat)

Cross / Crucifix

2008-04-10T18:39:00.001+08:00

- Mula sa salitang Latin “cruciare” na ang kahulugan ay “pagpapahirap”. Ang krus para sa ating mga Kristiyano ay hindi lamang isang imahe ng kalungkutan. Bagama’t ang krus ay may mga negatibong kahulugan, para sa ating mga Kristiyanong Katoliko ang krus ang nagsisilbing patnubay sa paggawa ng kabutihan at pagsunod sa mga turo ni Kristo. Sinisimbolo nito ang pagbubuwis ng buhay ni Kristo para sa kaligtasan ng mga tao. Kalimitang makikita natin ang imahe ng krus sa halos lahat ng simbahan at tahanang Katoliko. (Patty dela Rosa - Paat)

Confession Room

2008-04-10T18:38:00.001+08:00

- (kumpisalan) Makikita sa isang bahagi ng simbahan. Dito nagaganap ang pagbibigay at pagtanggap ng Sakramento ng Kumpisal o Pagbabalik-loob. Ang mga pari bilang mga alagad ng Diyos ang siyang kumakatawan kay Kristo sa Sakramentong ito. (Patty dela Rosa - Paat)

Altar Table Covering

2008-04-10T18:36:00.001+08:00

- Ang telang ginagamit na pantaklob sa altar table; kalimitang ito ay may tatlo o apat na bahagi. Ang kulay ng telang gingamit ay naayon din sa kung anong okasyon ang ipinagdiriwang. Sa mga ordinaryong Misa kalimitang puti ang ginagamit.(Patty dela Rosa - Paat)

Chalice Veil

2008-04-10T16:30:00.001+08:00

- Ito ang nagsisilbing pantakip sa o pantaklob sa chalice, pall, paten, at purificator. Ang kulay nito ay tumutugma sa kulay na isinusuot ng pari. (Patty dela Rosa - Paat)

Pall

2008-04-10T16:28:00.001+08:00

- Ito ay hugis parisukat na tela na nilagyan ng cardboard sa loob upang tumigas. Makikita natin ito sa ibabaw ng chalice at ito ang nagsisilbing proteksiyon sa anumang dumi na maaring malaglag sa loob ng chalice. (Patty dela Rosa - Paat)

Cruets

2008-04-10T16:16:00.002+08:00

- Dalawang tila maliliit na pitsel na nagsisilbing sisidlan ng alak at tubig na ginagamit sa Misa.
(Patty dela Rosa - Paat)

Corporal

2008-04-10T16:14:00.001+08:00

- Mula sa salitang Latin na ang ibig sabihin ay “ KATAWAN”. Ito ay ang puting tela na tinitiklop ng siyam na beses at inilalatag bilang proteksiyon sa chalice, paten at ciborium upang maiwasan ang paglaglag sa sahig ng maliliit na bahagi ng Sagradong Ostiya.(Patty dela Rosa - Paat)

Purificator

2008-04-10T16:08:00.002+08:00

- (Puripikador) Ito ang maliit na telang linen na tinitiklop ng pari ng tatlong beses na ipinapatong sa ibabaw ng chalice, ginagamit bilang pamunas ng pari sa chalice at paten pagkatapos magbigay ng komunyon. (Patty dela Rosa - Paat)

Chalice

2008-04-10T15:52:00.002+08:00

Ang kopa para sa alak at tubig, karaniwang yari sa ginto o pilak. Ito ang nagsisilbing sisidlan ng alak at tubig para sa Banal na Eukaristiya. (Patty dela Rosa - Paat)

Altar / Altar Table

2008-04-04T19:13:00.003+08:00

- Ang mesang ginagamit para sa pagdiriwang ng Banal na Misa ay tinatawag na “altar”. Tinatawag din itong “Hapag ng Panginoon”. Dito nagaganap ang paghahandog ng Banal na Misa bilang isang sakripisyo.

Ito rin ang nagpapaalala kung saan si Jesus sa huling hapunan ay ibinahagi ang Kanyang sarili sa Kanyang mga alagad. Higit sa lahat ito ang nagpapaalaala sa atin na ang Eukaristiya ang pinakamahalagang pagkain ng ating kaluluwa.

Ang altar ay makikita nating sentro sa loob ng simbahan. Noong mga panahon ni Moises o Lumang Tipan ang mga paring Hudyo ay nag-aalay ng mga iba’t-ibang handog bilang regalo sa Diyos at ito ay kanilang inilalagay sa altar.

Sa altar natin makikita ang tabernakulo kung saan inilalagay ang banal na ostiya na sumisimbolo sa katawan ni Kristo. At ang krus kung saan nagpapaalala ng banal na sakripisyo ni Kristo at ang kaligtasan ng mga tao. At sinasabi nga na ito ang pinaka main attraction sa loob ng simbahan sapagkat dito ginaganap ang pagbabahagi ng Banal na Eukaristiya. (Patty dela Rosa - Paat)

Tabernacle

2007-06-29T14:59:00.000+08:00

(Tabernakulo) - Ang pinaka-blessed part ng simbahan, ito ay kadalasan matatagpuan sa gitna ng main altar. Dito itinatago ang mga Banal na Ostiya. Taimtim na respeto ang kinakailangang ialay natin sa Tabernakulo sa tuwing tayo ay papasok sa simbahan, lalo na kung tayo ay mapapadaan sa mismong harapan nito.

Kung ang pinto nito ay sarado, dapat tayong lumuhod sa pamamagitan ng ating kanang tuhod bilang pagbibigay-pugay sa Panginoon na nakaluklok dito. Kapag naman naka-expose ang Banal na Ostiya (nakalagay ang Ostiya sa monstrance), kinakailangan nating lumuhod sa pamamagitan ng ating dalawang tuhod at may kasabay na marahang pagyuko. (Mas maganda kung sasabayan pa natin sa ating puso ng mga salitang papuri sa Panginoon tulad ng "Hi, Lord! Narito po ako buong-buo para sa'Yo!," "Pinupuri kita, Lord!" "Sinasamba kita, Panginoon!" o kaya "Ikaw lang, Lord, wala ng iba!" Kahit ano, basta taos sa iyong puso.)

(Excess: Isa sa palatandaan na may laman ang isang tabernakulo ay kung nakasindi ang ilawan sa tabi nito. Tanging mga authorized persons lang - pari, deacon, at special ministers of the Eucharist - ang pinapayagang magbukas nito.)

Tabernacle Lamp

2007-06-29T14:58:00.000+08:00

(sanctuary lamp) Ito ang ilawan na sumasagisag sa presence ni Lord sa tabernakulo kaya't nararapat na ito ay patuloy na may sindi hangga't nasa loob ang Banal Na Ostiya. Maaring ito ay gawa sa wax o kandila subalit iminumungkahi ang paggamit ng olive oil dahil ito ay kumakatawan sa kalinisan, kapayapaan, at pagkamaka-Diyos.

Ambo

2007-06-29T14:57:00.001+08:00

(Lectern) Karaniwan itong nasa kaliwang bahagi ng altar kung saan ipinapahayag ang Salita ng Diyos at kung saan nangangaral ang pari o deacon.

Paten

2007-06-29T01:44:00.000+08:00

- Manipis na platitong gawa sa mamahaling metal na ginagamit ng pari sa Misa para paglagyan ng malaking ostiya. Ito iyong itinataas niya habang sinasabing: "Kapuri-puri Ka, Diyos Amang lumikha ng lahat, sa Iyong kagandahang-loob narito ang aming maiaalay: mula sa lupa at bunga ng aming paggawa, ang tinapay na ito para maging pagkaing nagbibigay-buhay." Itinataas din ito, kasama ng kalis, kapag binibigkas ng pari ang "Sa pamamagitan ni Kristo, kasama Niya at sa Kanya, ang lahat ng parangal at papuri ay sa Iyo, Diyos Amang Makapangyarihan kasama ng Espiritu Santo magpasawalang hanggan."

Thurible

2007-06-29T01:33:00.000+08:00

- (insensaryo) Sisidlang metal na nakakabit sa maliliit na kadena na ginagamit na sunugan ng insenso sa Misa at sa iba pang mga banal na pagidiriwang. Ito ay may kasamang incense boat (lalagyan ng insenso) at incense spoon.

Paschal Candle

2007-06-29T01:24:00.000+08:00

- (Cirio Pascual) Ito ay specially-designed candle na binabasbasan at sinisindihan sa gabi ng bisperas ng Linggo ng Pagkabuhay. Ito ang sagisag na si Kristo ang Liwanag ng Mundo. Patuloy itong sinisindihan hanggang sa Ascension Sunday.

Monstrance

2007-06-29T01:18:00.000+08:00

- Kadalasan natin itong nakikita sa Perpetual Eucharistic Adoration Chapel o kapag may Holy Hour, karaniwang gawa sa metal, ginagamit upang itanghal ang Katawan ni Kristo sa anyong malaking ostiya.

Kapag ito ay direktang nakaharap sa atin, kinakailangan tayong magbigay-pugay sa pamamagitan ng pagluhod sa ating 2 tuhod at may kasamang marahang pagyuko.

Ciborium

2007-06-29T01:17:00.000+08:00

- (siboryo) Para siyang kalis o malaking kopita na gawa sa mamahaling metal at ginagamit na sisidlan ng mga Banal na Ostiya sa pagbibigay ng komunyon at sa pagtatago nito sa tabernakulo.

Holy Water Fonts

2007-06-29T01:04:00.001+08:00

- Ito ay karaniwan natin nakikita sa may pintuan ng simbahan, kadalasan ay gawa sa bato, hawak ng anghel o nasa ilalim ng kalapati o kerubin. Minsan ay tinatawag natin itong sawsawan ng Agua Bendita.

Mahalaga ang ritwal na ginagawa nating pagsasawsaw dito ng ating hintuturo at palasingsingan daliri at saka magsa-sign of the cross sapagkat sa pamamagitan nito ay nililinis natin ang ating sarili sa pagpasok sa tahanan ng ating Banal na Diyos. Kaya nga di na uli dapat magsawsaw dito sa ating paglabas ng simbahan.

Baptismal Font

2007-06-29T00:58:00.000+08:00

- Isang tila palanggana na yari sa bato o marmol ( pwede rin kahoy o metal )kung saan isinasagawa ang Binyag. Bihirang simbahan na ang gumagamit nito dahil na rin sa dami ng mga nagpapa-Binyag.

Sacristy

2007-06-28T23:56:00.000+08:00

- Isang silid sa simbahan, kadalasan ay nasa gilid ng altar, kung saan nagtitipon ang pari at mga liturgical ministers bago magsimula ang Misa. Dito rin itinatago ang mga banal at mahahalagang gamit tulad ng mga liturgical vestments and utensils at iba pa.

Sacristy Bell

2007-06-28T23:55:00.000+08:00

- Ang batingaw na sa pintuan ng Sacristy. Ito ay pinatutunog bilang hudyat sa pagsisimula ng Misa at sa konsagrasyon, kung saan ang tinapay at alak ay nagiging Katawan at Dugo ni Kristo.

Sanctus Bell

2007-06-28T23:54:00.000+08:00

- Maliliit na batingaw na ginagamit ng sakristan upang ihudyat ang pagsisimula ng Misa, ang pag-awit ng "Papuri sa Diyos" at "Santo, Santo, Santo", ang pagtataas ng Katawan at Dugo ni Kristo, at ang Komunyon.